Pas sampai di sakulahan, si Achied ni bingung jua inya. Kalo pina ai parkir sakulahan tu kada aman. Nang ngarannya helm larang, banyak jua ai nang handak mancuntan. Biar ada satpam nya, pas satpam nya lengah kawa dijuhutnya. Makanya am si achied ni bapikir banar kaya apa supaya helmnya tadi aman. Bilang parak bapaparapat jam inya mamikirakan, kada tadapat jua caranya. Handak diandak wara, nyaman banar urang mancuntan. Handak diandak di kakaitan helm di kandaraan, maling pasti kawa manatak talinya. Biar talinya pagat, asal baik, kena kawa aja disambung, kaya itu pasti pikiran si maling tu. Handak dititipakan wadah satpam, tia kalu tapahurup lawan ampun urang. Timbul tapahurup nang helmnya bau, bah bisa kacilakaan kena dijalan.
Lawas banar si Achied tadi bapikir, duduk haja dikandaraan. Satpam am bilang maawasi inya banar lawan inya, kalu ai jar pa satpam tu inya handak mancuntan helm urang.
“Aduh, kaya apa yo?” jar achied dalam hati.
Pas imbah itu, lonceng masukan babunyi. Tapi Achied talihat himung
“Bah, bungul banar unda nih, bawa haja pang ka kalas, andak di lamari, ngalih-ngalih, unda duduk parak lamari kalo,”jar Achied,”Bah, maka pr balum tagawi lagi nah, uma helm, helm, lihati nah sayang banar aku lawan ikam,”jar Achied badadas bajalan ka kalas.
Sampai di kalas gurunya balum masuk, bapapandiran ai kakawanannya di kalas.
“Chied, ikam pr sudah digawi lah?”si Agus batakun.
“Balum, napa garang?”si Achid pulang batakun.
“Kadapapa ai, untung banar ikam maka pa xxx, kada turun jar,” ujar si Agus.
“Untung haja, lah, alhamdulillah,”si Achied kahimunan banar.
“Helm ikam tu kanapa dibawa?” takun amat
“Sayang helm, Mat ai”si achied manjawab.
“Kena bulikan bajalanan yo, bulikan sungsung jar Zaki pas istirahat partama,”Sutan mambawai
“Iya garang, ayu ja,”jar achied
Imbah maandak helm di lamari, dudukkai si Achied tadi bakumpul lawan kakawanannya. Bagigitaran bagiannya. Si achied ni umpat banyanyi haja, kada bisa inya bagitar. Nyaring jua pang bagiannya banyanyi, jadi ditagur guru kelas sabalah ai. Bahinip habis itu, kada tapi kadangaran lagi, lawas-lawas banyaring pulang. Ditagur pulang, maka nangini gitar nya diambil guru tadi. Karna kadada gawian, bagiannya ka kantin ai minum, haus imbah banyanyi.
Istirahat partama ada diumumakan bulikan sungsung karna guru handak rapat. Nang ngarannya bulikan sungsung kuciakannai kakanakannya. Si achied ni bakuciak jua, tapi lain nang dikuciaki.
“Ui, helm ku mana ui, beh bagian ikam ni, kada kawa malihat helm urang bagus, maaambil haja, bulikakan pang, ui Gus, bulikakan,”ujar Achied ka agus.
“Gasan napa aku manyambunyiakan helm ikam, helm ku gin ge-em jua, saaliran haja mereknya.”jar agus kada hakun dituduh.
“Siapa lagi nang katuju manyambunyiakan ampun urang. Siapakah tu urangnya tu.”jar amat sambil malihati sutan.
“Nah ikam manuduh aku kah mat? Mantang-mantang tas ikam rancak kasambunyiakan handak manuduh aku lah?” jar sutan.
“Lakasi nah tan bulikakan nyaman jua kita lakas bajalanan” jar achied.
“nah ikam umpat jua kah manuduh aku, Chied?”
“Mauk ikam ni,” jar achied.
Mancariiai saurangan achied di kalas. Buhannya manatawakan haja, kada hakun mambantui. Dibawah-bawah meja kadada, di bawah meja guru kada jua, di kelas sabalah kadada jua.
“E, tan bulikakan, kasian Achied tu na,”jar amat.
“i ih ha, kasian ikam cid ai,”jar sutan sambil bajalan kaparak jandila. Imbah itu bakuciak ai si sutan.
“Chied helmnya kadada, aku tadi manyambunyiiakan parak jandila,”bujuran tu
“Bujur-bujur nah,” jar achied sambil baparak.
“Bujuran to, aku kada badusta,” jar sutan pulang.
“Cari i pang kkalo parak situ haja,”jar Agus
Mancari i ai bagiannya tatap kada tadapat jua. Paksa am sutan manjulung helmnya lawan achied. Achied takutan inya kena dirazia, paksaia. Sutan pulang nang bingung kada behelm. Paksaai kena jar inya lewar jalan dalam haja.
Parak satangah bulan achied makai helm sutan, maka am, beh baunya tu kam, beh kaya itu pang. Rancak jua achied pusing bakandaraan dijalan. Untung inya paham, kada tapi laju bakandaraan. Koler inya nukar helm dulu, kalo pina dapat haja.
Sambil mahadangi lonceng masukan, bapapandiran bagiannya di bangku di muka kalas, untung haja kadada pr.
Pas bapapandiran datang Teri, kawan bagiannya tapi lain kalas.
“Nah tan helm ikam kubulikakan, harat lo aku lo, parak batatangah bulan kada diambil ambil, kada tahu lo aku nang manyambunyaiakan helm ikam.” Jar Teri sambil manjulung helm wadah Sutan.